ကျောက်စိမ်းအတုများနှင့် အတုလုပ်နည်းမျိုးစုံ
********************************
ကျောက်စိမ်းရာင်း၀ယ်သူတို့ မကြာခဏ တွေ့ကြုံရဆုံး အမှားအများဆုံးမှာ ကျောက်စိမ်းအတုများဖြစ်သည်။
ကျောက်စိမ်းအတု (၅) မျိုးရှိသည်။
(၁) ကျောက်စိမ်းအရောင်(အရည်)အတု
(၂) ကျောက်စိမ်းအသားတု
(၃) ကျောက်စိမ်းအဆက်အတု
(၄) ကျောက်စိမ်းအခွံအတု
(၅) ကျောက်စိမ်းတုံး အတု
(၁) ကျောက်စိမ်းအရောင်(အရည်)အတု
-----------------------------------------
ကျောက်စိမ်းအရောင်(အရည်) ပြုလုပ်ရန် အလွန်လွယ်ကူပါတယ် ။ ကပ်ရည်ရှိသောကျောက် ၊ အရည်အသွေးမကောင်းပဲ ဖြူရော်ရော်အရောင်အဆင်းရှိသည့် ကျောက်စိမ်းများကို အရောင်ဆိုး အတုပြုလုပ်ကာ ဈေးခေါ်ရောင်းချကြသည်။
အရောင်ဆိုးရန်အတွက် ဒေါင်းသည်းခြေကို အသုံးပြုကြသည်။ ဒေါင်းသည်းခြေစိုစိုဖြင့် ကျောက်စိမ်းအသားကို ပွတ်တိုက်ပေးထားလျှင် ကျောက်ရည်ကျောက်သွေး စိမ်းစိုတောက်ပြောင်ရွှန်းလဲ့လာကာ သာလွန်အရည်အသွေးရှိ ကျောက်စိမ်းအဖြစ်သို့ရောက်ရှိသွားပါတယ် ။ ထိုအခါ ဈေးကောင်းရဖို့အတွက် ပြချက်ကောင်းမက်လုံးအဖြစ်သို့ အာရုံတက်စေသွားပါတယ် ။ လူတစ်ချို့ကတော့ ဒေါင်းသည်းခြေအစား လူသည်းခြေကို အစားထိုးအသုံးပြုကြသည်ဟုကြားဖူးနားဝတော့ရှိဖူးသည် ( မြင်တော့မမြင်ဖူးသေးပါ ) ။ တရုတ်ပြည်တွင် အသုံးများနိုင်သည်ဟု ကျွန်တော် သုံးသပ်ရမည်။
ဟောင်ကောင်နှင့် တရုတ်ပြည်တို့တွင် အရောင်မရှိသော ကျောက်များကို ဟင်းသီးဟင်းရွတ်များမှ ထုတ်လုပ်သော ဆိုးဆေးများဖြင့် အရောင်ဆိုးရောင်းကြသည် ။ ခရမ်းရောင်ကျောက် ( ချွမ်ကာလာ ) ကိုလည်း အရောင်ဆိုးတက်ကြသေးသည် ။
အခြား ဆေးဆိုးပြီး အရောင်ခြယ်သော ကျောက်များမှာ
(1) Opal ( ကြောင်မျက်ရွကျောက် / အသားမရှိ မွနေသောကျောက် )
(2) Lapis lazuli ( ကျောက်မျက်အဖြစ်အသုံးပြုသည့်အပြာရောင်ဓာတ်သတ္တု )
(3) Chrysoprase ( ပန်းသီးစိမ်းရောင်ရှိသော ကွာတ်ဇ်ကျောက်တစ်မျိုး )
(4) Crocidolite
တစ်ချို့သောကျောက်စိမ်းအတုလုပ်သူတို့ကမူ ကျောက်စိမ်းအသားကောင်းပြီး ၊ အရည်အသွေး ၊ အရောင်အဆင်းအလွန်ညံ့သော ကျောက်ရိုင်းတုံးကို သင့်တော်သောနေရာမှ အပေါက်ဖောက်၍ အလွန်စိမ်းသော ဖန်သားတုံးငယ် သို့မဟုတ် သွားတိုက်တံရိုး အစိမ်းရောင် ၊ သွားတိုက်ဆေးအစိမ်းရောင် စသည်တို့ကို ဖြတ်တောက်မြှပ်နှံထားကျသည် ။ ယင်းကျောက်စိမ်းတုံးအတုတွေမှာ မသိ သူ တွေ အတွက် တော့ မက်လောက်စရာကြီးဖြစ်နေတော့၏။
စစ်ဆေးနည်း
---------------
၄င်းဆေးဆိုးထားသော ကျောက်စိမ်း၏ ကျောက်သားသည် တစ်ပြေးညီမနေပဲ ကျောက်ရည်ပြတ်နေတက်သည်။ ကွက်နေတက်သည် ။ အရောင်မညီညာ ကြားနေတက်သည် ။ အနုကြည့် မှန်ဘီလူးဖြင့်ကြည့်လျှင် ကောင်းစွာမြင်ရပြီး အလွယ်တကူသိနိုင်သည် ။ ကြာလာလျှင်ဆေးဆိုးထားသောအရောင်များ ပြောင်းလဲလာကာပျေက်ကွယ်သွားတက်သည် ။ ငရဲမီး ၊ ရေနွေးပူပူတို့ဖြင့် ကြာကြာ စိမ်ကြည့်၊ထိကြည့်၊နှစ်ကြည့်လျှင် အရောင်ပျောက်ကွယ်သွားနိုင်သည် ။
(၂) ကျောက်စိမ်းအသားတု
-----------------------------
ကျောက်စိမ်းအသားတုကို ပလတ်စတစ်ဖြင့် ပြုလုပ်တက်ကျသေးပါတယ်။ ယင်းပလတ်စတစ်ဖြင့် ပြုလုပ်ထားသောကျောက်စိမ်းကို အတု၊အစစ် ခွဲခြားသိနိုင်ရန်မှာ ဓာတုဗေဒစိန် သို့မဟုတ် ဥဿဖရားကျောက်ဖြင့် ခြစ်ကြည့်လျှင် ပလတ်စတစ်ဖြင့်ပြုလုပ်ထားသော ကျောက်စိမ်းအတုဖြစ်ပါက မျက်နှာပြင်ပေါ်တွင် အစင်းများထင်လာပြီး ကျောက်စိမ်းအစ်ဖြစ်ပါက မည်သည်မျှပြောင်းလဲခြင်းမရှိပါ ။
ကျောက်စိမ်းအသားတုကို ဖန်ဖြင့်လည်း ပြုလုပ်တက်သေးပါတယ် ။ ယင်းဖန်ဖြင့်ပြုလုပ်ထားသော ကျောက်အသားအတုတွင်းကို သေချာကြည့်လျှင် အမြှုပ်ကလေးများ ၊ ပူသီဖောင်းငယ်ကလေးများ ရှိနေ၊ဖြစ်နေ သည်ကို တွေ့ရမှာပါ။
(၃) ကျောက်စိမ်းအဆက်အတု
------------------------------
ကျောက်စိမ်းအဆက်အတုဆိုသည်မှာ ကျောက်စိမ်းအရိုင်းတုံးတစ်တုံး၏ အတွင်းတွင် အသားကောင်းကောင်း ၊ အရည်ကောင်းကောင်း ရှိနိုင်သည်အထင်နှင့် ခွဲဖြတ်ကြည့်သောအခါ အတွင်း၌ မှန်းချက်နဲ့နှမ်းထွက် မကိုက်သည့်အခါ နဂိုအတိုင်းပြန်ဆက်ကာ တခြားသူကို တဆင့်ပြန်ရောင်းချချင်းကို ဆိုလိုသည် ။
ယင်းသို့ကျောက်စိမ်းကို အဆက်ပြုလုပ်ရာတွင် အဆက်ရာမတွေ့အောင် ပလာစတာနည်းဖြင့် ပြုလုပ်တက်ကျပါတယ်။
(၄) ကျောက်စိမ်းအခွံအတု
--------------------------
ကျောက်စိမ်းအခွံအတုဆိုသည်မှာ ကျောက်ရည်ကျောက်သား တနည်း မျိုးတန်းအလွန်ညံ့သော ကျောက်မျိုးကို ကျောက်ရည်ကျောက်သား တနည်းမျိုးတန်းရင့်နေသော ကျောက်မျိုးဖြစ်အောင် အခွံကိုအတုပြုလုပ်၍ ပြချက်မှာ( ကွမ်ချက်ဖော်၍) ဈေးခေါ်ရောင်းချကြပါတယ် ။ အခွံအတုပြုလုပ်ရာတွင် အကောင်းဆုံးအခွံများဖြစ်ကျတဲ့ သစ်တော်ခွံ ၊ အကာခွံ၊ မြေမှန်ခွံ စသည့်အခွံမျိုးအများဆုံးပြုလုပ်ကြပြီး အသားမှာသေချာကြည့်လျှင် ပွယောင်းယောင်း ဖြစ်နေသည်ကို သတိထားကြည့်မှ သိနိုင်ပါတယ် ။။
စစ်ဆေးနည်း
--------------
ကျောက်စိမ်းအခွံအတုကို စမ်းသက်စစ်ဆေးရာမှာ ရောင်းသူမှလာ၍ရောင်းချသော ကျောက်စိမ်းအရိုင်းတုံးကို မသင်္ကာလျှင် ကျောက်၏အခွံကို သံချောင်း၊ ကျောက်ကြည့်ဓာတ်မီးဖြင့် ခေါက်ကြည့်ပါက အသံမှာ မလုံသလိုလို ၊ မပီပြင်သလိုလို ဖြစ်နေသည်ကို ခံစားမိမှာပါ ။ သက်သည်းဖြင့် ဖဲ့ကြည့်ပါက အခွံတုမှာ အသာအယာကွာကျတက်ပြီး အခွံအစစ်မှာ ပဲ့ဖို့ရာ မလွယ်ကူပါဘူး ။ ကျောက်စိမ်းတုံးကို မိမိနှာခေါင်းဖြင့် နမ်းကြည့်ပါ ။ ကော်တစ်မျိုးမျိုးဖြင့် ကပ်ထားသဖြင့် ကော်အနံ့လိုလို၊ ကတ္တရာဆေးနံ့လိုလို ရနေပါလိမ့်မည်။
(၅) ကျောက်စိမ်းတုံးအတု
---------------------------
ကျောက်စိမ်းအတုံးအတုဆိုသည်မှာလည်း ကျောက်စိမ်းအခွံအတုပြုလုပ်ပုံနှင့် ခပ်ဆင်ဆင်ဖြစ်ပါတယ် ။ သူကတော့ ပကတိမြေကြီးထဲမှရသော အရောင်မှန်သည့် ကျောက်စိမ်းအခွံအရိုင်းတုံးများကို များသောအားဖြင့်ပြုလုပ်ကြပါတယ် ။ ယင်းကျောက်စိမ်းအခွံအရိုင်းတုံးများ အတွင်း၌ ကျောက်စီကျောက်သား လုံး၀မှ မပါရှိပါဘူး ။ ထိုသို့သော ကျောက်စိမ်းတုံးကြီးများကို အပေါက်ငယ်များထွင်းဖောက်၍ အရည်အသွေး ကောင်းသော ကျောက်သားများကို အနည်းငယ်စီ ၃၊၄ နေရာခန့် အပေါ်မှ မြှုပ်ထားတက်ကြပါတယ် ။ မသိသူတို့ကြည့်လိုတဲ့အခါမှာ အလွန်ပြချက်ကောင်းသော ၊ အလွန်မက်မောဖွယ်ကောင်းသော ကျောက်စိမ်းတုံး အတုကြီးဖြစ်နေပါတော့တယ် ။
အသေးစိတ်ကို သေချာကြည့်မယ်ဆိုရင် သဲလွန်စ အနည်းငယ်ကို တွေ့ရမည်ဖြစ်ပါတယ်။။
ကျွန်တော့မိတ်ဆွေများလည်း အရောင်းမှား၊အ၀ယ်မှားတွေ မဖြစ်ကျပဲ လောဘဇောအာရုံကို သတ်နိုင်ပြီး အောင်ကျောက်များပိုင်ဆိုင်ကြပါစေဗျာ။။ 
